Koan-î chok-chiá | 關於作者

Koan-î chok-chiá

Albert Camus /al.ber ka.mú/ (1913-1960) chhut-sì tī tong-sî Franse sio̍k-tē Algeria ê chi̍t-ê kang-lâng ka-têng. Chá-nî i lóng tòa tī Pak-Afrika, tī hia i bat chia̍h-kòe chē-chē chióng thâu-lō͘ -- chhin-chhiūⁿ kóng tī khì-siōng-kio̍k, tī chū-tōng-chhia lêng-kiāⁿ hōe-siā, tī hòe-ūn-hâng -- koh ná tī Algeria Tāi-ha̍k oân-sêng ha̍k-gia̍p. Āu-lâi i chìn-ji̍p sin-bûn-kài. I tùi Kabylie tē-khu Muslim kan-khó͘ seng-oa̍h ê pò-tō ín-khí Algeria chèng-hú chhái-chhú hêng-tōng, chū-án-ne i mā siū-tio̍h tāi-chiòng ê chù-ì.

Ùi 1935 kàu 1938 nî, i keng-êng Theatre de l'Equipe. Che sī chi̍t-keng hì-kio̍k-siā, poaⁿ-ián iû Malraux, Gide, Synge, Dostoevski, téng-téng hì-kio̍k-ka ê chok-phín. Tī Tē-jī-chhù Sè-kài Tāi-chiàn kî-kan, i sī "Franse Hoán-khòng" oa̍h-tāng ê chú-iàu chok-ka, mā sī tong-sî chú-iàu tē-hā pò-chóa "Combat" (chiàn-tàu) ê pian-chi̍p. Camus tī hì-kio̍k kài it-ti̍t lóng chin oa̍h-thiàu, i ū chhut-pán kúi-ā chhut ê hì-kio̍k mā ū kong-ián. I ê sió-soat chú-iàu ê ū: Gōa-lâng (L'Étranger, 1942), Che (La Peste, 1947), Tūi-lo̍h (La Chute, 1956), kap Hòng-tio̍k hām Ông-kok (L'Exil et le Royaume, 1957); i ê tiat-ha̍k-tek ê bûn-chi̍p, Sisyphus ê Sîn-ōe (Le Mythe de Sisyphe, 1942) hām Hoán-poān-chiá (L'Homme révolté, 1951); iáu ū i ê kio̍k-pún chāi-chāi lóng khak-tēng i tī hiān-tāi Franse bûn-ha̍k kài ê chhut-tioh tē-ūi. 1957 nî Camus tit-tio̍h Nobel Bûn-ha̍k Chióng. Camus tī 1960 nî 1 goe̍h chhe 4 in-ūi chhia-hō sí-bông, hit-sî 46 hòe.

[Chu-liāu lâi-goân: Wikipedia]

--

關於作者

Albert Camus /al.ber ka.mú/ (1913-1960) 出世 tī 當時 Franse 屬地 Algeria ê 一个工人家庭. 早年伊 lóng 蹛 tī 北 Afrika, tī 遐伊 bat 食過濟濟種頭路 -- 親像講 tī 氣象局, tī 自動車零件會社, tī 貨運行 -- koh ná tī Algeria 大學完成學業. 後來伊進入新聞界. 伊對 Kabylie 地區 Muslim 艱苦生活 ê 報導引起 Algeria 政府採取行動, 自 án-ne 伊 mā 受著大眾 ê 注意.

Ùi 1935 到 1938 年, 伊經營 Theatre de l'Equipe. 這是一間戲劇社, 搬演 Malraux, Gide, Synge, Dostoevski 等等戲劇家 ê 作品. Tī 第二次世界大戰期間, 伊是 "Franse 反抗" 活動 ê 主要作家, mā 是當時主要地下報紙 "Combat" (戰鬥) ê 編輯. Camus tī 戲劇界一直 lóng 真活跳, 伊有出版幾若齣 ê 戲劇 mā 有公演. 伊 ê 小說主要 ê 有: 外人 (L'Étranger, 1942), 災 (La Peste, 1947), 墮落 (La Chute, 1956), kap 放逐和王國 (L'Exil et le Royaume, 1957); 伊 ê 哲學的 ê 文集, Sisyphus ê 神話 (Le Mythe de Sisyphe, 1942) 和反叛者 (L'Homme révolté, 1951); 猶有伊 ê 劇本在在 lóng 確定伊 tī 現代 Franse 文學界 ê chhut-tioh 地位. 1957 年 Camus 得著 Nobel 文學獎. Camus tī 1960 年 1 月初 4 因為車禍死亡, 彼時 46 歲.

[資料來源: Wikipedia]

--